പ്രധാനമന്ത്രി നരേന്ദ്ര മോദി വെള്ളിയാഴ്ച കർണാടകയിലെ ദേവനഹള്ളിക്ക് സമീപം ബോയിങ്ങിന്റെ പുതിയ ആഗോള എഞ്ചിനീയറിംഗ് ആൻഡ് ടെക്നോളജി സെന്റർ കാമ്പസ് ഉദ്ഘാടനം ചെയ്തു. 1,600 കോടി രൂപ ചെലവിൽ നിർമ്മിച്ച 43 ഏക്കർ അത്യാധുനിക ബോയിംഗ് ഇന്ത്യ എൻജിനീയറിങ് ആൻഡ് ടെക്നോളജി സെന്റർ (ബിഐഇടിസി) കാമ്പസ് അമേരിക്കയ്ക്ക് പുറത്തുള്ള കമ്പനിയുടെ ഏറ്റവും വലിയ നിക്ഷേപമാണ്.
ഉദ്ഘാടന വേളയിൽ പ്രധാനമന്ത്രി മോദി വ്യോമയാന, ബഹിരാകാശ മേഖലയിലെ ഇന്ത്യയുടെ മുന്നേറ്റങ്ങളെ അഭിനന്ദിച്ചു, ഈ മേഖലയിലെ സ്ത്രീകളുടെ വർദ്ധിച്ചുവരുന്ന സ്വാധീനം എടുത്തുപറഞ്ഞു . വ്യോമയാനരംഗത്ത് സ്ത്രീകളുടെ പങ്ക് ഊന്നിപ്പറഞ്ഞ അദ്ദേഹം, ഇന്ത്യയിലെ മൊത്തം പൈലറ്റുമാരിൽ 15% സ്ത്രീകളാണ് , ഇത് ആഗോള ശരാശരിയുടെ മൂന്നിരട്ടിയാണ്. ഇപ്പോൾ ആഗോളതലത്തിൽ മൂന്നാമത്തെ പ്രധാന ആഭ്യന്തര വ്യോമയാന വിപണിയായ ഇന്ത്യ അന്താരാഷ്ട്ര വ്യോമയാന വിപണിയെ മുന്നോട്ട് നയിക്കുമെന്ന് മോദി ആത്മവിശ്വാസം പ്രകടിപ്പിച്ചു.
രാജ്യത്തുടനീളമുള്ള കണക്റ്റിവിറ്റി അടിസ്ഥാന സൗകര്യങ്ങൾ വർധിപ്പിക്കുന്നതിൽ നിർണായക പങ്ക് വഹിച്ച ‘ഉഡാൻ’ പദ്ധതിയാണ് ആഭ്യന്തര വ്യോമയാന വിപണിയുടെ വിജയമെന്ന് അദ്ദേഹം പറഞ്ഞു. ഇന്ത്യയുടെ വികസിച്ചുകൊണ്ടിരിക്കുന്ന വ്യോമയാന മേഖലയിലേക്ക് കൂടുതൽ പെൺകുട്ടികളുടെ പ്രവേശനം പ്രോത്സാഹിപ്പിക്കുന്നതിന് ലക്ഷ്യമിട്ടുള്ള ബോയിംഗ് സുകന്യ പ്രോഗ്രാമിന്റെ സമാരംഭവും പ്രധാനമന്ത്രി പ്രഖ്യാപിച്ചു.
ബോയിംഗ് സുകന്യ പ്രോഗ്രാം ഇന്ത്യയിലുടനീളമുള്ള പെൺകുട്ടികൾക്കും സ്ത്രീകൾക്കും സയൻസ്, ടെക്നോളജി, എഞ്ചിനീയറിംഗ്, മാത്സ് (STEM) മേഖലകളിൽ നിർണായക വൈദഗ്ധ്യം നേടാനും വ്യോമയാന മേഖലയിലെ ജോലികൾക്കായി പരിശീലനം നൽകാനും അവസരമൊരുക്കും. ചെറുപ്പക്കാരായ പെൺകുട്ടികളിൽ ബന്ധപ്പെട്ട തൊഴിലുകളിൽ താൽപ്പര്യം പ്രചോദിപ്പിക്കുന്നതിനായി 150 ആസൂത്രിത സ്ഥലങ്ങളിൽ STEM ലാബുകൾ സ്ഥാപിക്കുന്നത് ഇതിൽ ഉൾപ്പെടുന്നു. വിമാന പരിശീലന പാഠ്യപദ്ധതി, സർട്ടിഫിക്കേഷനുകൾ, സിമുലേറ്റർ പരിശീലനം, കരിയർ ഡെവലപ്‌മെന്റ് പ്രോഗ്രാമുകൾ തുടങ്ങിയ വിവിധ വശങ്ങളെ പിന്തുണയ്ക്കുന്ന പൈലറ്റ് പരിശീലനത്തിന് വിധേയരായ സ്ത്രീകൾക്ക് ഈ സംരംഭം സ്കോളർഷിപ്പുകളും വാഗ്ദാനം ചെയ്യും.
ബോയിംഗ് പ്രസിഡന്റും സിഇഒയുമായ ഡേവിഡ് എൽ കാൽഹൗൺ, പ്രധാനമന്ത്രി മോദിയുടെ ഇന്ത്യയെക്കുറിച്ചുള്ള പരിവർത്തന കാഴ്ചപ്പാടിനെ പിന്തുണയ്ക്കാനുള്ള അവസരത്തിന് നന്ദി അറിയിച്ചു. രാജ്യത്ത് എയ്‌റോസ്‌പേസ് നവീകരണം പ്രോത്സാഹിപ്പിക്കുന്ന സ്റ്റാർട്ടപ്പുകൾ, സ്വകാര്യ സംരംഭങ്ങൾ, സർക്കാർ ഇക്കോസിസ്റ്റം എന്നിവയുമായുള്ള പങ്കാളിത്തത്തിനുള്ള മൂലക്കല്ലായി അദ്ദേഹം ബോയിംഗ് കാമ്പസിനെ ഉയർത്തിക്കാട്ടി.
ചടങ്ങിൽ കർണാടക ഗവർണർ താവർചന്ദ് ഗെലോട്ട്, മുഖ്യമന്ത്രി സിദ്ധരാമയ്യ, നിയമസഭയിലെ പ്രതിപക്ഷ നേതാവ് ആർ അശോക, ബോയിംഗ് ചീഫ് ഓപ്പറേറ്റിംഗ് ഓഫീസർ സ്റ്റെഫാനി പോപ്പ് എന്നിവരുൾപ്പെടെയുള്ള പ്രമുഖർ പങ്കെടുത്തു. 2023 ഡിസംബറിലെ കണക്കനുസരിച്ച് 6,000-ത്തിലധികം ജോലിക്കാരുള്ള ബോയിംഗ് ഇന്ത്യ, രാജ്യത്തിന്റെ എഞ്ചിനീയറിംഗ്, ആർ & ഡി ടാലന്റ് പൂളിൽ ഒരു പ്രധാന സംഭാവനയായി മാറിയിരിക്കുന്നു.